في
الخميس 13 مايو 2021

جديد الديوان

03-18-2018 09:04

كتبت في عام 1439هـ

الايالله تجعل لي مع اهل الجاه حظ و جاه

ولعل لكلمتي قدر وقبول ليا هرجتبها


ابا اشفع عند كساب المدايح وازهمه وانخاه

ابن درع الكريم اللي بني عمه يوجبها


وترى الطيب مناعير القبايل بالطلب تنصاه

تجيه اهل اللوازم قدر ويحقق مطالبها


وانا مع غيري من اهل الوجاهه جاهنا سقناه

رجانا فيه والاقدام لجل ارضاه نتعبها


هقاوينا كبيره في رجا عفوه وفي حسناه

محمد عزوة اللي حملته مزرن يقوم ابها


محمد يارجا اللي في رجا فزعتك بعد الله

برك من عقب ماحدت له الدنيا مخالبها


محمد ياسندنا اللي ينومسنا ليا جيناه

نبا ننخاك تكفا يوم تكفا ماجهلت ابها


نصيناك وطلبناك العفو وانت العفو تقواه

دخيلك وانت منصا اهل الطلب وانته معزبها


تجمل والجميل الله يبيض وجه من وسواه

وعوايدك الجمايل من قديم الوقت تكسبها


ومن يعفو ويعتق نفس خلاق الملا يجزاه

اجر واحسان في دنياه واخرته يفوز ابها


وترى اللي يفعل المعروف قدامه يبا يلقاه

وحنا العزوه اللي ماتوخر لاعتزيت ابها


متى ماحتاجنا الطيب يحصلنا على يمناه

وفي الشده بحول الله ظنونه مانخيبها


الا يالاد مشيب ياذرى اللي لاعته دنياه

صناديد الرجال اللي عريباتٍ مناسبها


كرمكم من قديم الوقت جمٍ مايقاس اقصاه

ومواقفكم تنومسنا ليا شبت شبايبها


اهل صفح وتسامح في القديم من الزمن واتلاه

لكم ندوات عظما ماحصرها من يحسبها


وسويد اليوم منكم عندكم مزبانه وملجاه

بعد رحمة كريم الوجه رحمتكم يلوذابها


ترى يكفيه من همه وحزنه والشقا ماجاه

هذي بلوا من كبار البلاوي لابلينا ابها


عساكم تعتقون اللي زمانه بالعقل ثناه

كبود اطفاله وكبده لهيب الهم شاهبها


ليا جا طاري الفرقا لواحدهم جهش ببكاه

عليهم خيمت دنيا الغرابيل بمصايبها


وترى امر الله نافذ والله اليا اراد شي امضاه

يمضيها على المخلوق لو كان يتجنبها


وحنا كلبونا ربع واللي صار مانرضاه

لكن اقدار محسومه ورب العرش كاتبها


ترانا طالبينك يامحمد لاترد الجاه

طلبناك العفو قل تم تكفا تم جود ابها

ضاوي العصيمي


تعليقات 0 | إهداء 0 | زيارات 1056


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google


تقييم
1.24/10 (49 صوت)

Powered by Dimofinf cms Version 3.0.0
Copyright© Dimensions Of Information Inc.