في
الجمعة 14 مايو 2021

جديد الديوان

04-05-2011 07:36

هذه القصيدة عرفت بقصيدة (العماره ) او (المقاول) وقد كتبها شاعرنا عند تعمير منزله وقال انها تتكلم عن معاناته ومعانات الكثير ووجدت اصدا كبيره

قالوا نبي من قصايدك الغراميه = قلت الهواء والغزل قفلت بيبانه
انا من الليله افكاري أسمنتيه = حديد وبلك وسمنت وخرسانه
ولاعاد لي هم شاغل غير هاذيه = قواعد البيت وجسوره وعمدانه
احلم بفلا على ذوقي خياليه = تكون بين المباني كنها دانه
انسى بها ايامي اللي شيبت فيّه = ويصير لي مع هوامير البلد خانه
احلام مير الحقايق جات عكسيه = واصبحت مديون والجيران ديانه
وقام المقاول يهدر وتضرس اللحيه = باحت فلوسي وقام يحد نيبانه
من عقب ماني بعمه نعنبو حيه = اليوم ماكني الاضمن صبيانه
ان قلت راع الظروف وزيّن النيه = واصبر وياصلك حقك حومر اعيانه
قال ايه هاذي سواليف الحراميه = هات الدراهم ترى الاخلاق تعبانه
عودت أعزم واروّح للشريطيه = واخذ ونيتين والتقسيط بثمانه
واعطى المقاول ثمنها شبه جبريه = والراتب اقساط من راسه لكرعانه
والورع وامه يبون اشياء ضروريه = والتاجر احتدني من دون دكانه
يقول للفقر في نظرتك ماريه = ودفاتر الدين من شرواك مليانه
وعوّدت لاجبت لاهاذي ولاذيه = وعزي لمن راح وانكف ماقضى شانه
العذر مايقنع المحتاج موليه = والمزح ماهوب يرضي ناس زعلانه
مغير اروّح بهم في كل عصريه = للبيت ونمتر الاضلاع واركانه
ونحاول نعيش وسط احلام ورديه = مابين غرفة فلان وغرفة فلانه
وأن مرنا من جماعتنا الزراويه = لاشافني قال ذا ضاوي وورعانه!
يبغا الفوائد وحول له بدهويه = وقام يتهكم وفيّ يجرب اللسانه
طلعت للشمس وانا كنت بالفيه = وضحك بي اللي يشح بزاد ضيفانه
يازياد مافي قلوب الناس ماويه = لكن شكواى للمعبود سبحانه

وقد جاراها الشاعر/فهد بن متعب الديري الحربي بهذه القصيدة

ضاوي قلبها مناحه للهواويه = وانا سرتبي طواريقه وقيفانه
ووردت عدٍ رشاه يخاطف إ دليه = دلو تصدر خفيف ودلو مليانه
وامسيت ادير الفكاير واسوي النيه = واصبحت ولْيا الفرج فتاح بيبانه
ياضاوي الراي عندي والعمل نيه = الاول الله والاخو لوقفة اخوانه
ان طعت شوري ترى ربعك نداويه = نبي إنخل المقاول يبلع إلسانه
نبا انتعاون عليه ونعلن الهيّه = ولاشاف ضرب ام خمس ايعرف عمانه
والجايد إيجود وارزاقه سماويه = والناس للناس مديونه وديانه
والله ما صد والعزوه شبابيه = تابى المروّه على حروبه وعتبانه
وكل القبايل لها الامداح مثنيه = والطيّب ونعم من حضره وبدوانه
ياالله عسى ضاوي إيختم الثلاثيه = ب إسمه ثلاثي .. وبحسابه .. وعنوانه
واللي يبيها فكاهيه فكاهيه = لكـــــّــن لاتروح فلة ضاوي إرهانه
وسلامتكم فهد بن متعب الديري الحربي



××××

وجاراها الشاعر/ ماجد الناقول السبيعي بهذه القصيدة


عزاه بعض الشكاوي كنها فِيّه=حرك بها ضاوي الشاعر ووجدانه
منول مجامل (ن) لابين الكيه=ومادام ليّه خوي بواسي احزانه
ظروفنا نفسها ميّه على ميّه=واللي يعانيه منه النفس طفشانه
كسبت لي ف البلد ياخي شعبيه=من شافني قال الا ياكثر صدقانه
اي النداوي وايات النداويه=في كل شارع علي رجال ضميانه
ماغير احاود ماداني للبلد جيه=مابغى المعلم ولابغى شوفة اخوانه
اعرف سيارته واعرف بني خيّه=واعرف وسم (ن) يحطه فوق ليحانه
لاشفته اجظ كني شايف (ن) حيه=اشرقني الله يشرق ساس جدانه
غديت حتى مع الورعان لعبيه=الرجل تضحك عليه اليوم غرانه
من عقب ذا البيت واخلاقي تجاريه=ماغير دادوه قبل يثور بركانه
يااهل المعرفه غدت لي حسنتي سيه=ولاّّ موازين طيب الناس خربانه
ياضاوي الوقت يضحك للرباديه=ولاّّ النشامى مثل حلياك شقيانه
وجيهنا من سموم القيظ مصليه=ووجيهم من براد الذل مندانه
ووجيهنا دون واجبنا شقاويه=ووجيهم من فعول العز عريانه
هذا حقيقة كفاح اجيال عصريه=في صفحة الوقت يبقى العز عنوانه
استرسل الشعر وامرس وانقطع غيه=عجزت ارده على غيي وميدانه
سلم على حمود وحميدان ووخيه= وقل هامة العز من شرواه منهانه
تو ابتدى للمعاني جد جديه= وتو افرزت ريح يشمومه وريحانه
نفح الحجازي على نفحات شرقيه=تلاعب المشرقين بحالي الحانه
رسم الخيال ومعاني الشعر محميه=راع الجميله بها ضاوي وسلطانه
يالله بقدره إلاهيه سماويه=يخلص البيت ياضاوي من احسانه
حتى يعود الحجازي للحجازيه=ويذوق برشومي الطايف ورمانه
وسلامتكم
ماجد الناقول



×××××

وجاراها الشاعر /سلطان بن منصور بهذه الابيات

ي
اضاوي اصبر على الروحات والجيه=ترى عزوم الفتى والصبر عوانه
وابعد عن العشق وعلوم الهواويه=من يوم حرب البناء طبيت ميدانه
لوكان مرتبك العذرا السنافيه=اللي بنهب القلوب الخضر فنانه
قل جنبي عن طريقي حيد يابنيه=انا الهواء تبت من ضلعه وريعانه
وخلك بموضوع بنيانك بجديه=واحرص ترى زمرة العمال خوانه
خلك سياسي كما الناس السياسيه=وان ضاق وقتك يجيلك قوم نشطانه
للطيب شفقين ولفعله شفاويه=ولاهم على مايمدونه بمنانه
امثال ابو متعب الى قال قطيه=والنعم به عد ماينطقبه السانه
يسوق للمرجله بنت العمانيه=لعل يفداه ناس دوم كسلانه
وغيره من اقصى العرب وايضا الدناويه=ربعٍ لمدت هل الطالات طربانه
لاتشكي الفقر وانت من السعوديه=وان حدك الوقت لك ماوى ومزبانه
ازبن على اللي عطاهم غيث وسميه=يعين الادنى والاقصى مدهم عانه
والله لتنسى العوز والفقر ووخيه=ويشد مرغم ولايمسي بمرحانه

وسلامتكم سلطان بن منصور

تعليقات 0 | إهداء 0 | زيارات 3184


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google


تقييم
10.00/10 (1 صوت)

Powered by Dimofinf cms Version 3.0.0
Copyright© Dimensions Of Information Inc.